18 лістапада 2010 года a 17.00 гадзіне ў Нацыянальным гістарычным музеі Рэспублікі Беларусь адкрылась выстаўка швейных машын "Няскончаная п'еса для механічнага шыла".
Падчас адкрыцця выстаўкі адбылiся паказ мадэляў студэнтаў Інстытута сучасных ведаў і выступленне групы "Нагуаль".
Выстаўка падрыхтавана Нацыянальным гістарычным музеем Рэспублікі Беларусь і Беларускім саюзам дызайнераў, з удзелам прыватных калекцыянераў Саргея Шыла, Паўла Статкевіча, Зміцера Сурскага.
Швейная машынка для розных пакаленняў не проста абавязковы атрыбут сямейнага побыту. Адначасова гэта культурны і тэхналагічны фетыш, прадмет мастацтва, фамільная рэліквія, сродак творчай рэалізацыі і нават першага бізнэсу. A на сённяшні дзень яна ўжо з'яўляецца аб'ектам калекцыянавання і эстэтычнай асалоды. Падчас працы яна стварае свой непаўторны гук, што пераўтварае яе з "ткацкага" ў музычны інструмент.
Швейная машынка з'яўляецца носьбітам стылю і люстэркам эпохі, яна здольная мяняць сваё аблічча пад уплывам часу і моды. Акрамя таго, кожная машынка звязаная з асобай пэўнага чалавека, яго сям'ёй, што надае ёй непаўторнасць і індывідуальнасць. Беларусь, размешчаная ў сэрцы Еўропы, уяўляе сабой цэнтр спажыўцоў машынак з усяго свету, ад легендарнага Singer, Pfaff, Kayser да рэдкіх малавядомых марак. Для Беларусі дадзеная выстаўка важная яшчэ і тым, што ў мястэчках і гарадах даўно склалася досыць развітая рамесная вытворчасць.
Цяпер старыя швейныя машынкі паступова сыходзяць з паўсядзённага жыцця. Таму важна не прапусціць гэты момант, калі машынка ўжо губляе свае ўтылітарныя функцыі і пераўтвараецца ў аб'ект эстэтычнай асалоды, але яшчэ не цалкам адрываецца ад штодзённасці, звязваецца з успамінамі дзяцінства, сямейнай памяццю...
У рамках выстаўкі наведвальнікі змогуць атрымаць разгорнутую інфармацыю аб асноўных вытворцах швейных машын ХІХ-ХХ стст., убачыць спадарожныя атрыбуты краўцоў (манекены, нажніцы, прасы, тэкстыль мінулых гадоў і інш.), ілюстрацыйны матэрыял па гісторыі моды і рэкламу.
Выстаўка "Няскончаная п'еса для механічнага шыла" стане рыскай да гістарычнага партрэта эпохі мадэрнізму, паноптыкумам шэдэўраў прамысловага дызайну ХІХ-ХХ стст. і данінай пашаны аднаму з сімвалаў тэхнічнага генія чалавека - швейнай машыне.
Нацыянальны гістарычны музей Рэспублікі Беларусь
Адрас: г.Мінск, вул. К. Маркса, 12, Музей працуе з 11.00 да 19.00, выхадны - панядзелак тэл. для даведак 227 00 05 history.museum.by
